Фарзандим 3 ойлик. УЗИ врачи эхокардиография – юракни ультратовушли текширув усулини ўтказиб, хулосасида 3 та ноль ёзиб қўйди. Бу нима дегани?

Юракни эхографик текширувда, асосан болаларда текширув хулосасида ёзиладиган 3 та ноль – бу аслида учта ООО харфи бўлиб, русча «открытое овальное окно», яъни очиқ овал тешик синдроми дегани. Бу овал тешикча юракнинг бўлмачалари орасида жойлашиб, нормада 3 мм дан катта бўлмаслиги керак. Бу тешикнинг битмай қолиши юракнинг кичик нуқсони хисобланиб, юрак-қон томир тизимида кучли гемодинамик бузилишларга олиб келмаслиги билан тушунтирилади. Ушбу хулосадан вахима қилишнинг хожати йўқ, бу табиий жараён бўлиб, одатда бола бир ёшга тўлгунча унинг битиб кетиши кузатилади.

Унинг қандай клиник белгилари бор?
Атиб ўтилганидек бу патологиянинг ўзига хос клиник белгилари бўлмайди. Бу касаллик эса юракни профилактик УЗИ текширувларида аниқланади. Агарда бу синдром юракнинг бошқа нуқсонлари билан келганда, айтайлик юрак клапанлари нуқсони ёки «очиқ артериал йўл» билан -  юрак камераларининг кенгайиши, бўлмачалараро тўсиқча ва клапанларни тортишиб ўз вазифасини бажармай кўйиши кузатилади.

Бу болаларда қуйидаги клиник белгилар билан намоён бўлади:
•    Бронхлар ва ўпканинг доимий шамоллашлари;
•    Зўриқиш пайтида (яъни бола йиғлаганда, йўталганда, жисмоний зўриқишда, бронхиал астма хуружларида) боланинг оғиз-бурун учбурчагини ва лабларини кўкариши кузатилади.
•    Боланинг жисмоний ўсишдан секинлашуви, тез толиқиш ва хансирашга сабаб бўлади.
•    Вақти-вақти билан боланинг бирданига хушдан кетиши кузатилиши мумкин.  



© https://t.me/gepamed_ultra